భారత స్టాక్ మార్కెట్లలో విదేశీ పెట్టుబడిదారులు (FPI) మళ్లీ కొనుగోళ్ల జోరు పెంచారు. నవంబర్ నెలలో ఇప్పటివరకు భారత ఈక్విటీ మార్కెట్లలో ఏకంగా రూ.53,739 కోట్ల పెట్టుబడులు పెట్టారు. సెప్టెంబర్ 2024 తర్వాత ఇదే అత్యధిక నెలవారీ పెట్టుబడుల ప్రవాహం కావడం విశేషం. నవంబర్ 2 నుంచి 9 వరకు కేవలం ఆరు ట్రేడింగ్ రోజుల్లోనే ఈ పెట్టుబడులు వచ్చాయి.

గత రెండు నెలలుగా భారత మార్కెట్ల నుంచి విదేశీ పెట్టుబడిదారులు భారీగా నిధులను ఉపసంహరించుకున్నారు. సెప్టెంబర్‌లో రూ.35,861 కోట్లు, అక్టోబర్‌లో రూ.34,843 కోట్ల పెట్టుబడులను వెనక్కి తీసుకున్నారు. అయితే నవంబర్‌లో పరిస్థితి మారి మళ్లీ నికర కొనుగోలుదారులుగా మారారు. అమెరికా మార్కెట్లలో AI సంబంధిత షేర్ల అమ్మకాలు, భారత కంపెనీల మెరుగైన ఆదాయ వృద్ధి, పెద్ద కంపెనీల షేర్ల ఆకర్షణీయమైన విలువలు ఇందుకు కారణాలుగా నిపుణులు పేర్కొంటున్నారు.

ముఖ్యంగా బ్యాంకింగ్, ఫైనాన్షియల్ సర్వీసెస్, ఐటీ, ఆటోమొబైల్, టెలికాం రంగాలకు చెందిన ప్రముఖ కంపెనీల షేర్లలో విదేశీ పెట్టుబడిదారులు కొనుగోళ్లు జరిపారు. నవంబర్‌లో వచ్చిన భారీ పెట్టుబడులు దేశీయ స్టాక్ మార్కెట్లలో మళ్లీ ఉత్సాహాన్ని పెంచాయి. అయితే 2026లో ఇప్పటివరకు విదేశీ పెట్టుబడుల మొత్తం నికర ఉపసంహరణలు ఇంకా రూ.2.41 లక్షల కోట్లుగా ఉన్నాయని డిపాజిటరీ గణాంకాలు వెల్లడిస్తున్నాయి.