ఆంధ్రప్రదేశ్ ముఖ్యమంత్రి నారా చంద్రబాబు నాయుడు అధ్యక్షతన అమరావతిలోని రాష్ట్ర సచివాలయంలో కీలక క్యాబినెట్ సమావేశం జరిగింది. ఈ సమావేశంలో మంత్రులతో పలు అంశాలపై చర్చించిన సీఎం, రాష్ట్రంలో ఇటీవల జరిగిన స్థానిక సంస్థల ఎన్నికల్లో సాధించిన విజయాలతో నిర్లక్ష్యంగా వ్యవహరించవద్దని సూచించారు. ప్రజలకు మరింత మెరుగైన సేవలు అందించడంపై దృష్టి పెట్టాలని స్పష్టం చేశారు.

స్థానిక ఎన్నికల విజయాన్ని చూసి గర్వపడకుండా మరింత అప్రమత్తంగా పనిచేయాలని చంద్రబాబు మంత్రులకు సూచించారు. అభివృద్ధి, సంక్షేమ కార్యక్రమాలను సమతుల్యంగా ముందుకు తీసుకెళ్లాలని తెలిపారు. ముఖ్యంగా 2029 అసెంబ్లీ ఎన్నికలే లక్ష్యంగా పెట్టుకుని ఇప్పటి నుంచే అందరూ సమన్వయంతో పనిచేయాలని దిశానిర్దేశం చేశారు.

మరోవైపు ప్రజలపై నిత్యావసర ధరల భారం పడకుండా చర్యలు తీసుకోవాలని సీఎం సూచించారు. కూరగాయల ధరలు తగ్గుముఖం పట్టాయని, బియ్యం ధరలను కూడా తగ్గించేందుకు ప్రయత్నించాలని తెలిపారు. రాబోయే ఎన్నికలతో పాటు రాష్ట్ర అభివృద్ధి, ప్రజా సంక్షేమానికి ప్రాధాన్యత ఇవ్వాలని మంత్రులకు స్పష్టం చేశారు.